Friday, 13 January 2017

Dubai Trip: Motiongate. CityWalk رحلة دبي: ملاهي موشنغيتن سيتي ووك

سادس يوم قررنا نرجع مرة ثانية لدبي باركس بس هالمرة اخترنا ملاهي موشنغيت Motiongate . ملاهي موشنغيت عبارة عن 5 مناطق ومستوحاة من 5 استوديوهات افلام: قرية السنافر، ستوديو سنترال، دريم ووركس، لاينزغيت، وكولومبيا بكتشرز.  وعدد الالعاب فيها 21 لعبة تنفع الصغار والكبار. طبعا حجزنا التذاكر أونلاين وحجزنا فاست تراك عشان لاننطر دور بالزحمة. طبعا هالملاهي يديدة وافتتاحها كان بتاريخ 16 / 12 / 2016 وأعلنوا عن طريق شخصية كويتية مشهورة بالسوشيال ميديا إن دريمووركس راح تفتح خلال 3 أيام.

 زيارتنا للملاهي كانت بتاريخ 29 / 12 /2016 فكنا رايحين على أساس ان دريمووركس فاتحة بس لما وصلنا واستلمنا تذاكرنا استغربت ان المكان صخة! وايينا موظف إماراتي ويقولنا انتوا ماتدرون إن أغلب الملاهي مسكرة!! اللي مفتوح قرية السنافر وكولومبيا بيكتشرز بس!احنا يايين عشان دريمووركس (اللي فيها شريك، مدغشقر، كنغ فو باندا). قلناله شلون راح ندري إذا انتو مو معلنين عالويبسايت؟!! لما تدخلون الويبسايت حاطين كل المدن وكل الملاهي!! (الحين لما تدخلون الويبسايت حاطين الألعاب المسكرة الظاهر تحركوا عقب إيميل الشكوى اللي دزيته) جان يقول احنا مبلغين شباك التذاكر يقولون حق الناس عشان لايشترون ويتوهقون! زين واللي شرى أونلاين؟!! وليش تخلون الناس تيي كل هالدرب واخرتها تقولونلهم مسكرين!! طبعا اضطرينا ندخل وأول شي رحناله قرية السنافر.




أول شي تريقنا بالكافيه






 
قرية السنافر


كافيه السنافر
مدينة السنافر فيها 3 ألعاب ووحدة مسكرة! لعبة عبارة عن بلاي غراوند للصغارفيها كور اسفنج. وثاني لعبة كانت سيارة تفتر فيكم داخل استوديو السنافر ومايركبون فيها اللي عمرهم أقل من 4 سنين!

video

عقبها رحنا كولومبيا بيكتشرز اللي فيها أفلام: أندروورلد لعبته سينما 4دي ماتنفع حق اللي يخافون من الفامبايرز، فلينت لاب عبارة عن بلاي غراوند لليهال الصغار فيها زحلاقيات وتسلق، غوست بستر، هوتيل ترانسلفينيا، ذا غرين هورنت، زومبي لاند لعبته للكبار بس فماركبوا ولدي عمره 7 سنين وكان في لعبة مسكرة.


فلنت لاب
وبس!! خلال أقل من ساعتين تخلصونها!

أما بوليوود ثالث مدينة ملاهي داخل دبي باركس فمارحنالها لأن ماتهمنا الأفلام الهندية. في ناس شروا تذكرة الملاهي الثلاثة لأنها أرخص. خلوا يوم كامل لليغولاند ويوم موشنغيت مع بوليوود.

بالليل رحنا سيتي ووك CityWalk المكان روعة عبارة عن مطاعم ومحلات ومراكز ترفيه: هب زيرو فيه ألعاب للكبار، غرين بلانيت، ماتيل بلاي (ألعاب للصغار على بارني وتوماس وأنجلينا) وسينما. من المحلات الحلوة هناك ليفيل كيدز محل كبير فيه ماركات وايد ومحل عالم الشوكولا يضم كل أنواع الكاكاو الفاخر مثل كافالي وبولغاري وغيرهم.

 رحنا مطعم سيرينديبيتي المشهور بالايس كريم والفروزن هوت شوكليت نفس اللي بلاس فيغاس. كل شي طلبناه كان لذيذ.


video

video


































No comments:

Post a Comment